Ихтисослаштирилган таълим муассасалари

Ихтисослаштирилган таълим муассасалари алоҳида таълим эҳтиёжлари бўлган болаларга:

умумий ўрта таълим бериш;

коррекцион-педагогик ва даволаш-соғломлаштириш ёрдамини кўрсатиш;

касбий ва ижтимоий кўникмаларини ривожлантириш;

жамиятга мослашиши ва интеграциялашувига кўмаклашиш мақсадида ташкил этилади.

Муассасаларнинг турлари

Ихтисослаштирилган таълим муассасалари қуйидаги турларга бўлинади:

I тур — эшитишида нуқсони бўлган болалар учун мактаб ва мактаб-интернатлар;
II тур — кўришида нуқсони бўлган болалар учун «Нурли маскан» мактаб ва мактаб-интернатлари;
III тур — руҳий ва ақлий ривожланишида нуқсонлари бўлган болалар учун мактаб ва мактаб-интернатлар;
IV тур — таянч-ҳаракат аппаратида нуқсони бўлган болалар учун мактаб-интернатлар;
V тур — кўп функционал инклюзив-ресурс мактаблар;
VI тур — кўп тармоқли ихтисослаштирилган мактаблар.

Ўқувчилар сони

Ихтисослаштирилган таълим муассасаларида ўқувчилар сони:

I–IV турдаги муассасаларда — 250 нафардан;
V–VI турдаги муассасаларда — 300 нафардан ошмаслиги керак.

Санитария талаблари ва муассасанинг сиғими имкон берса, Соғлиқни сақлаш вазирлиги билан келишилган ҳолда белгиланган меъёрдан оширишга рухсат берилиши мумкин.

Қабул қилиш ёши

Болалар ихтисослаштирилган таълим муассасасининг биринчи синфига 7 ёшга тўладиган йилда, тайёрлов синфига эса 6 ёшга тўладиган йилда қабул қилинади.

Алоҳида таълим эҳтиёжлари бўлган боланинг таълим олиш ҳуқуқини таъминлаш мақсадида белгиланган мактаб ёшидан 5 йилгача катта бўлган болани ҳам қабул қилишга рухсат этилади.

Қабул қилиш тартиби

Болани ихтисослаштирилган таълим муассасасига юбориш:

ҳудудий бошқарма ҳузуридаги психологик-тиббий-педагогик комиссия хулосаси;
ота-она ёки ота-она ўрнини босувчи шахснинг розилиги асосида амалга оширилади.

Бола, биринчи навбатда, яшаш ҳудудидаги муассасага жойлаштирилади. Тегишли муассаса ёки бўш ўрин бўлмаса, яшаш жойига яқин бошқа ҳудуддаги муассасага қабул қилиниши мумкин.

Қабул ўқув йили давомида муассаса директорининг буйруғи билан расмийлаштирилади.

Қабул қилиш учун ҳужжатлар

Боланинг шахсий ҳужжатлар йиғмажилдига қуйидагилар киритилади:

ота-она ёки ота-она ўрнини босувчи шахснинг аризаси;
психологик-тиббий-педагогик комиссия хулосаси;
аввал таълим олган бўлса, таълим ҳақидаги ҳужжатлар, маълумотнома ва тавсифнома;
боланинг ривожланиш тарихи ва тегишли мутахассисларнинг тиббий хулосалари.

Ҳужжатлар боланинг таълим эҳтиёжи ва соғлиғи хусусиятидан келиб чиқиб тақдим этилади.

Қабул қилинадиган болалар

Муассасаларга:

эшитишида ёки кўришида нуқсони бўлган;
таянч-ҳаракат аппаратида нуқсони бўлган;
руҳий ёки ақлий ривожланишида нуқсони бўлган;
ривожланишида икки ва ундан ортиқ нуқсони бўлган болалар психологик-тиббий-педагогик комиссия хулосасига мувофиқ қабул қилинади.

Қабул қилиш мумкин бўлмаган ҳолатлар

Ихтисослаштирилган таълим муассасаси шароити боланинг эҳтиёжларига мос бўлмаган, жумладан оғир ёки чуқур ақлий нуқсонлар, оғир хулқ-атвор бузилишлари, мустақил ҳаракатланиш ва ўз-ўзига хизмат қилиш имкони бўлмаган айрим ҳолатларда бола мазкур муассасага қабул қилинмайди.

Шунингдек, бир ойда беш мартадан ортиқ такрорланадиган тутқаноқлар ва қонунчиликда белгиланган бошқа тиббий ҳолатлар ҳам ҳисобга олинади. Бундай болаларга уларнинг эҳтиёжларига мос бошқа таълим, парвариш ёки ижтимоий хизмат шакли белгиланади.

Норматив ҳужжатлар

Ўзбекистон Республикаси Вазирлар Маҳкамасининг 2021 йил 12 октябрдаги 638-сон қарори