Ixtisoslashtirilgan ta’lim muassasalari

Ixtisoslashtirilgan ta’lim muassasalari alohida ta’lim ehtiyojlari bo‘lgan bolalarga:

umumiy o‘rta ta’lim berish;

korrektsion-pedagogik va davolash-sog‘lomlashtirish yordamini ko‘rsatish;

kasbiy va ijtimoiy ko‘nikmalarini rivojlantirish;

jamiyatga moslashishi va integratsiyalashuviga ko‘maklashish maqsadida tashkil etiladi.

Muassasalarning turlari

Ixtisoslashtirilgan ta’lim muassasalari quyidagi turlarga bo‘linadi:

I tur — eshitishida nuqsoni bo‘lgan bolalar uchun maktab va maktab-internatlar;
II tur — ko‘rishida nuqsoni bo‘lgan bolalar uchun «Nurli maskan» maktab va maktab-internatlari;
III tur — ruhiy va aqliy rivojlanishida nuqsonlari bo‘lgan bolalar uchun maktab va maktab-internatlar;
IV tur — tayanch-harakat apparatida nuqsoni bo‘lgan bolalar uchun maktab-internatlar;
V tur — ko‘p funktsional inklyuziv-resurs maktablar;
VI tur — ko‘p tarmoqli ixtisoslashtirilgan maktablar.

O‘quvchilar soni

Ixtisoslashtirilgan ta’lim muassasalarida o‘quvchilar soni:

I–IV turdagi muassasalarda — 250 nafardan;
V–VI turdagi muassasalarda — 300 nafardan oshmasligi kerak.

Sanitariya talablari va muassasaning sig‘imi imkon bersa, Sog‘liqni saqlash vazirligi bilan kelishilgan holda belgilangan me’yordan oshirishga ruxsat berilishi mumkin.

Qabul qilish yoshi

Bolalar ixtisoslashtirilgan ta’lim muassasasining birinchi sinfiga 7 yoshga to‘ladigan yilda, tayyorlov sinfiga esa 6 yoshga to‘ladigan yilda qabul qilinadi.

Alohida ta’lim ehtiyojlari bo‘lgan bolaning ta’lim olish huquqini ta’minlash maqsadida belgilangan maktab yoshidan 5 yilgacha katta bo‘lgan bolani ham qabul qilishga ruxsat etiladi.

Qabul qilish tartibi

Bolani ixtisoslashtirilgan ta’lim muassasasiga yuborish:

hududiy boshqarma huzuridagi psixologik-tibbiy-pedagogik komissiya xulosasi;
ota-ona yoki ota-ona o‘rnini bosuvchi shaxsning roziligi asosida amalga oshiriladi.

Bola, birinchi navbatda, yashash hududidagi muassasaga joylashtiriladi. Tegishli muassasa yoki bo‘sh o‘rin bo‘lmasa, yashash joyiga yaqin boshqa hududdagi muassasaga qabul qilinishi mumkin.

Qabul o‘quv yili davomida muassasa direktorining buyrug‘i bilan rasmiylashtiriladi.

Qabul qilish uchun hujjatlar

Bolaning shaxsiy hujjatlar yig‘majildiga quyidagilar kiritiladi:

ota-ona yoki ota-ona o‘rnini bosuvchi shaxsning arizasi;
psixologik-tibbiy-pedagogik komissiya xulosasi;
avval ta’lim olgan bo‘lsa, ta’lim haqidagi hujjatlar, ma’lumotnoma va tavsifnoma;
bolaning rivojlanish tarixi va tegishli mutaxassislarning tibbiy xulosalari.

Hujjatlar bolaning ta’lim ehtiyoji va sog‘lig‘i xususiyatidan kelib chiqib taqdim etiladi.

Qabul qilinadigan bolalar

Muassasalarga:

eshitishida yoki ko‘rishida nuqsoni bo‘lgan;
tayanch-harakat apparatida nuqsoni bo‘lgan;
ruhiy yoki aqliy rivojlanishida nuqsoni bo‘lgan;
rivojlanishida ikki va undan ortiq nuqsoni bo‘lgan bolalar psixologik-tibbiy-pedagogik komissiya xulosasiga muvofiq qabul qilinadi.

Qabul qilish mumkin bo‘lmagan holatlar

Ixtisoslashtirilgan ta’lim muassasasi sharoiti bolaning ehtiyojlariga mos bo‘lmagan, jumladan og‘ir yoki chuqur aqliy nuqsonlar, og‘ir xulq-atvor buzilishlari, mustaqil harakatlanish va o‘z-o‘ziga xizmat qilish imkoni bo‘lmagan ayrim holatlarda bola mazkur muassasaga qabul qilinmaydi.

Shuningdek, bir oyda besh martadan ortiq takrorlanadigan tutqanoqlar va qonunchilikda belgilangan boshqa tibbiy holatlar ham hisobga olinadi. Bunday bolalarga ularning ehtiyojlariga mos boshqa ta’lim, parvarish yoki ijtimoiy xizmat shakli belgilanadi.

Normativ hujjatlar

O‘zbekiston Respublikasi Vazirlar Mahkamasining 2021-yil 12 oktyabrdagi 638-son qarori