Болани давлат боғчасига жойлаштириш

Давлат мактабгача таълим ташкилотларига, одатда, 3 ёшдан 7 ёшгача бўлган болалар қабул қилинади.

Тўлиқ қувват билан ишламаётган айрим давлат боғчаларига 2 ёшдан 3 ёшгача бўлган болаларни пуллик хизмат асосида қабул қилиш мумкин.

Қандай мурожаат қилинади?

Болани боғчага жойлаштириш учун сўровнома:

Давлат хизматлари маркази орқали;
Ягона интерактив давлат хизматлари портали орқали топширилади.

ЯИДХП орқали болани навбатга қўйишни унинг отаси, онаси ёки фарзандликка олувчиси амалга оширади.

Давлат хизмати бепул кўрсатилади.

Нечта боғчани танлаш мумкин?

Ариза берувчи болани бир вақтнинг ўзида учтагача мактабгача таълим ташкилотига навбатга қўйиши мумкин.

Танланган боғчада бўш ўрин бўлса, тизим йўлланмани автоматик шакллантиради. Бўш ўрин бўлмаса, сўровнома умумий ёки имтиёзли рўйхатга киритилади.

Бола танланган боғчалардан бирига қабул қилинса, бошқа боғчалар бўйича навбатлар автоматик бекор қилинади.

Кимларга устунлик берилади?

Имтиёзли рўйхатга қуйидаги болалар киритилади:

I ва II гуруҳ ногиронлиги бўлган шахсларнинг болалари;
кўп болали оилаларнинг болалари;
етим ёки ота-она қарамоғидан маҳрум бўлган болалар;
тазйиқ ва зўравонликдан жабр кўрган шахсларнинг болалари;
Ижтимоий реестрга киритилган оилаларнинг болалари;
«Аёллар дафтари»даги ижтимоий ҳимояга муҳтож ёлғиз аёлларнинг болалари;
контракт бўйича ҳарбий хизматчилар, ички ишлар ва божхона органлари ходимларининг болалари;
талабалар ва педагогларнинг болалари;
акаси ёки опаси шу боғчага қатнаётган болалар;
ихтисослаштирилган боғчадан умумий турдаги боғчага ўтказилаётган соғайган болалар.

Алоҳида таълим эҳтиёжи бўлган болалар инклюзив гуруҳлардаги белгиланган ўринларга психологик-тиббий-педагогик комиссия хулосаси асосида навбатсиз қабул қилиниши мумкин.

Йўлланма ва қабул қилиш муддати

Йўлланма бўш ўрин пайдо бўлган куни электрон тизимда навбатга мувофиқ автоматик шакллантирилади.

Йўлланма шаклланганидан кейин болани боғчага қабул қилиш 15 иш куни ичида расмийлаштирилиши керак. Акс ҳолда йўлланма ҳақиқий эмас деб ҳисобланади.

Ариза берувчи хабарномадаги тасдиқ кодини тақдим этгач, болани қабул қилиш боғча раҳбарининг буйруғи билан 2 иш куни ичида расмийлаштирилади.

Қачон рад этилиши мумкин?

Давлат хизмати:

танланган боғча ёки гуруҳ ёпилган бўлса;
сўровномада нотўғри ёки ишончсиз маълумотлар кўрсатилган бўлса рад этилиши мумкин.

Тузатиш мумкин бўлган хатолар аниқланса, ариза берувчига уларни 5 иш куни ичида бартараф этиш имконияти берилади. Бошқа асослар билан рад этиш тақиқланади.

Норматив ҳужжатлар

Ўзбекистон Республикаси Вазирлар Маҳкамасининг 2018 йил 28 мартдаги 244-сон қарори

Ўзбекистон Республикаси Президентининг 2022 йил 7 мартдаги ПФ–87-сон Фармони