Bolani davlat bog‘chasiga joylashtirish

Davlat maktabgacha ta’lim tashkilotlariga, odatda, 3 yoshdan 7 yoshgacha bo‘lgan bolalar qabul qilinadi.

To‘liq quvvat bilan ishlamayotgan ayrim davlat bog‘chalariga 2 yoshdan 3 yoshgacha bo‘lgan bolalarni pullik xizmat asosida qabul qilish mumkin.

Qanday murojaat qilinadi?

Bolani bog‘chaga joylashtirish uchun so‘rovnoma:

Davlat xizmatlari markazi orqali;
Yagona interaktiv davlat xizmatlari portali orqali topshiriladi.

YaIDXP orqali bolani navbatga qo‘yishni uning otasi, onasi yoki farzandlikka oluvchisi amalga oshiradi.

Davlat xizmati bepul ko‘rsatiladi.

Nechta bog‘chani tanlash mumkin?

Ariza beruvchi bolani bir vaqtning o‘zida uchtagacha maktabgacha ta’lim tashkilotiga navbatga qo‘yishi mumkin.

Tanlangan bog‘chada bo‘sh o‘rin bo‘lsa, tizim yo‘llanmani avtomatik shakllantiradi. Bo‘sh o‘rin bo‘lmasa, so‘rovnoma umumiy yoki imtiyozli ro‘yxatga kiritiladi.

Bola tanlangan bog‘chalardan biriga qabul qilinsa, boshqa bog‘chalar bo‘yicha navbatlar avtomatik bekor qilinadi.

Kimlarga ustunlik beriladi?

Imtiyozli ro‘yxatga quyidagi bolalar kiritiladi:

I va II guruh nogironligi bo‘lgan shaxslarning bolalari;
ko‘p bolali oilalarning bolalari;
etim yoki ota-ona qaramog‘idan mahrum bo‘lgan bolalar;
tazyiq va zo‘ravonlikdan jabr ko‘rgan shaxslarning bolalari;
Ijtimoiy reestrga kiritilgan oilalarning bolalari;
«Ayollar daftari»dagi ijtimoiy himoyaga muhtoj yolg‘iz ayollarning bolalari;
kontrakt bo‘yicha harbiy xizmatchilar, ichki ishlar va bojxona organlari xodimlarining bolalari;
talabalar va pedagoglarning bolalari;
akasi yoki opasi shu bog‘chaga qatnayotgan bolalar;
ixtisoslashtirilgan bog‘chadan umumiy turdagi bog‘chaga o‘tkazilayotgan sog‘aygan bolalar.

Alohida ta’lim ehtiyoji bo‘lgan bolalar inklyuziv guruhlardagi belgilangan o‘rinlarga psixologik-tibbiy-pedagogik komissiya xulosasi asosida navbatsiz qabul qilinishi mumkin.

Yo‘llanma va qabul qilish muddati

Yo‘llanma bo‘sh o‘rin paydo bo‘lgan kuni elektron tizimda navbatga muvofiq avtomatik shakllantiriladi.

Yo‘llanma shakllanganidan keyin bolani bog‘chaga qabul qilish 15 ish kuni ichida rasmiylashtirilishi kerak. Aks holda yo‘llanma haqiqiy emas deb hisoblanadi.

Ariza beruvchi xabarnomadagi tasdiq kodini taqdim etgach, bolani qabul qilish bog‘cha rahbarining buyrug‘i bilan 2 ish kuni ichida rasmiylashtiriladi.

Qachon rad etilishi mumkin?

Davlat xizmati:

tanlangan bog‘cha yoki guruh yopilgan bo‘lsa;
so‘rovnomada noto‘g‘ri yoki ishonchsiz ma’lumotlar ko‘rsatilgan bo‘lsa rad etilishi mumkin.

Tuzatish mumkin bo‘lgan xatolar aniqlansa, ariza beruvchiga ularni 5 ish kuni ichida bartaraf etish imkoniyati beriladi. Boshqa asoslar bilan rad etish taqiqlanadi.

Normativ hujjatlar

O‘zbekiston Respublikasi Vazirlar Mahkamasining 2018-yil 28-martdagi 244-son qarori

O‘zbekiston Respublikasi Prezidentining 2022-yil 7-martdagi PF–87-son Farmoni