Tibbiyot sohasida xususiy sektor qo‘shimcha qo‘llab-quvvatlanadi

“Tibbiyot sohasida xususiy sektorni qo‘shimcha qo‘llab-quvvatlash chora-tadbirlari to‘g‘risida”gi Prezident Farmoni (PF–74-son, 05.05.2026 y.) qabul qilindi.

✅ Farmonga ko‘ra, 2026 yil 1 iyuldan:

♦ nodavlat tibbiyot tashkilotlariga davlat tibbiy sug‘urtasi hamda litsenziya doirasida barcha yo‘nalishlarda bemorlarga Davlat budjeti hisobidan tibbiy xizmatlarni ko‘rsatishga ruxsat beriladi. Bunda davolash xarajatlari davlat va nodavlat tibbiyot tashkilotlari uchun yagona bazaviy narxlar asosida qoplab beriladi;

♦ Davlat tibbiy sug‘urtasi jamg‘armasiga ajratilgan mablag‘lar doirasida bemorlarga tibbiyot tashkilotlarida ixtisoslashtirilgan ambulator tibbiy xizmatlar ko‘rsatish va jarrohlik amaliyotlarini o‘tkazish uchun yo‘llanma berish tartibi joriy etiladi;

♦ bemorlarga tibbiy yordam ko‘rsatish uchun Davlat budjetidan ajratilgan mablag‘larni tibbiyot tashkilotlari kesimida taqsimlash amaliyoti bekor qilinadi hamda kasalliklar yo‘nalishlari kesimida oylik mablag‘lar hajmini belgilash tartibi joriy qilinadi;

♦ tibbiyot tashkilotlari tomonidan tibbiy faoliyat uchun litsenziya talablari va shartlari buzilgan taqdirda, litsenziyaning amal qilishini faqat bunday buzilishlarga yo‘l qo‘yilgan tibbiy ixtisoslik turi qismida to‘xtatib turish amaliyoti yo‘lga qo‘yiladi;

♦ tug‘uruqni qabul qilish yo‘nalishida tibbiyot tashkilotlarini tashkil etishda bakteriologik laboratoriya xizmatlarini autsorsing asosida yo‘lga qo‘yishga ruxsat beriladi.

Sog‘liqni saqlash vazirligi huzuridagi Farmatsevtika tarmog‘ini rivojlantirish agentligi Tibbiyot va farmatsevtika tarmog‘ini rivojlantirish agentligi (Agentlik) etib qayta nomlanadi.

Nodavlat tibbiyot tashkilotlariga transplantatsiya amaliyoti bilan shug‘ullanishga ruxsat beriladi

Farmonga ko‘ra, milliy yoki xalqaro akkreditatsiyadan o‘tgan nodavlat tibbiyot tashkilotlariga 2027 yil 1 maydan qonunchilik hujjatlarida belgilangan tartib asosida transplantatsiya amaliyoti bilan shug‘ullanishga ruxsat beriladi.

Bunda:

♦ nodavlat tibbiyot tashkilotlari tomonidan qonunchilik hujjatlarida belgilangan inson a’zolari va (yoki) to‘qimalarini transplantatsiya qilish tartibiga rioya etilishi tibbiy faoliyat uchun litsenziya talab va shartlari etib belgilanadi;

♦ nodavlat tibbiyot tashkilotlarining inson a’zolari va (yoki) to‘qimalarini transplantatsiya qilish bilan bog‘liq faoliyati “xavfni tahlil qilish” tizimi orqali xavfi yuqori ko‘rsatkichga ega faoliyat hisoblanadi;

♦ nodavlat tibbiyot tashkilotlari tomonidan transplantatsiya amaliyoti amalga oshirilgan bemorlar va donorlar to‘g‘risidagi ma’lumotlar majburiy tartibda Sog‘liqni saqlash vazirligiga muntazam taqdim etib boriladi.

2027 yil 1 yanvardan tajriba-sinov tariqasida Samarqand viloyatida ijtimoiy va ishlab chiqarish infratuzilmasini rivojlantirish dasturiga kiritilgan birlamchi tibbiy-sanitariya yordami muassasalari bino-inshootlarini qurish va ularda rekonstruksiya ishlarini olib borish bo‘yicha quyidagi takliflar ma’qullandi:

► obyektlarda tadbirkorlar o‘z mablag‘lari hisobidan Sog‘liqni saqlash vazirligi tomonidan tasdiqlangan loyihalar asosida qurilish-montaj ishlarini olib boradi;

► qurilish-montaj ishlari yakunlangandan so‘ng belgilangan tartibda obyektlarda nazorat o‘lchovi o‘tkaziladi;

► obyektlarni qabul qilish ishlari yakunlangach tadbirkorlarga belgilangan mablag‘lar to‘lab beriladi.

Tibbiyot sohasida ko‘rsatilayotgan xizmatlar sifati oshiriladi

“Tibbiyot sohasida ko‘rsatilayotgan xizmatlar sifatini oshirish bo‘yicha qo‘shimcha chora-tadbirlar to‘g‘risida”gi Prezident qarori (PQ–170-son, 05.05.2026 y.) qabul qilindi.

Qarorga ko‘ra, 2026 yil 1 iyuldan:

♦ Sog‘liqni saqlash vazirligi huzuridagi “Tibbiyot tashkilotlarini litsenziyalash va akkreditatsiyalash markazi” davlat muassasasi (Markaz) tibbiy faoliyatni litsenziyalash bo‘yicha ishchi organ sifatida Sog‘liqni saqlash vazirligi nomidan litsenziya berish hamda litsenziyalash bilan bog‘liq boshqa barcha funksiyalarni amalga oshiradi;

♦ tibbiyot tashkilotlarida tibbiy xizmat sifati nazoratini amalga oshirish bo‘yicha alohida tuzilma faoliyatini yo‘lga qo‘yish litsenziya talab va shartlari etib belgilanadi;

♦ tibbiy faoliyatni litsenziyalash talab va shartlariga rioya qilinishi hamda tibbiy xizmat sifati nazorat qilish bo‘yicha:

▪️ tekshiruv boshlangandan so‘ng 24 soat ichida “Yagona davlat nazorati” axborot tizimida ro‘yxatga olish orqali Biznes-ombudsmanni xabardor etish tartibi joriy qilinadi;

▪️ tekshiruv o‘tkazayotgan nazorat qiluvchi organga nisbatan ilgari tekshirilgan faoliyat davri, predmeti va obyekti bo‘yicha qayta tekshiruv o‘tkazilmasligiga oid talablar tatbiq qilinmaydi;

▪️ o‘tkaziladigan profilaktika tadbirlari tadbirkorlik subyektlariga tegishli obyektlarni ko‘zdan kechirish orqali amalga oshirilishi mumkin;

♦ tibbiyot tashkilotlarini milliy akkreditatsiyadan o‘tkazish vakolati belgilangan tartibda akkreditatsiyadan o‘tkazilgan tibbiyot sohasidagi nodavlat notijorat tashkilotlariga ham beriladi.

Yagona talablar asosida tibbiy axborot tizimi joriy etiladi

Qarorga ko‘ra, davlat tibbiyot muassasalariga litsenziya berish orqali ularda litsenziya talab va shartlariga rioya etilishini nazorat qilish tizimi joriy etiladi.

Bunda quyidagi muddatlarda litsenziya olinishi majburiy etib belgilanadi:

♦ respublika darajasidagi davlat tibbiyot muassasalari – 2027 yil 1 aprelga qadar;

♦ hududiy darajadagi davlat tibbiyot muassasalari – 2028 yil yakuniga qadar;

♦ tuman (shahar) darajasidagi davlat tibbiyot muassasalari – 2030 yil yakuniga qadar.

⛔️ 2028 yil 1 apreldan Davlat tibbiy sug‘urtasi jamg‘armasiga milliy yoki Sog‘liqni saqlashda sifat bo‘yicha xalqaro jamiyati (ISQua) tomonidan akkreditatsiyadan o‘tkazilgan tashkilotlarning akkreditatsiyasi (xalqaro akkreditatsiya)dan o‘tmagan respublika darajasidagi davlat tibbiyot muassasalari va nodavlat tibbiyot tashkilotlari bilan tibbiy xizmatlar xaridi bo‘yicha shartnoma tuzish taqiqlanadi.

2027 yil 1 apreldan tibbiy faoliyatni litsenziyalashda tibbiyot tashkilotlarining axborot tizimlarini Sog‘liqni saqlash vazirligi tomonidan belgilanadigan yagona talablarga (standartlarga) moslashtirgan holda Raqamli sog‘liqni saqlash platformasiga majburiy tartibda bepul integratsiya qilish orqali ma’lumot almashinuvini ta’minlash shartlari kiritiladi.