Salomatlik holatini tasdiqlovchi maʼlumotnomani qo‘shimcha hujjatlarsiz va bepul onlayn olish mumkin.

O‘zbekistonda 086 shakldagi tibbiy maʼlumotnomani olish jarayoni soddalashtirildi. Endi uni my.gov.uz portali orqali onlayn rasmiylashtirish mumkin. Ilgari fuqarolar poliklinikalarga qayta-qayta borib, navbatda turishga majbur bo‘lgan bo‘lsa, endilikda xizmat to‘liq raqamlashtirildi.

086-shakldagi maʼlumotnoma turli toifadagi fuqarolar uchun talab qilinadi. Xususan, oliy o‘quv yurtlari, litsey va kollejlarga kirayotgan abituriyentlar, ishga joylashayotgan sportchi va ish izlovchilar, sudyalikka nomzodlar, shuningdek, “Muruvvat” va “Saxovat” uylariga yo‘llanma olgan keksalar va nogironligi bo‘lgan shaxslarga beriladi.

Hujjatni olish uchun portalga kirib, "Sog‘liqni saqlash" bo‘limiga o‘ting va 086-shakldagi maʼlumotnomani rasmiylashtirish xizmatini tanlang, shundan so‘ng tayyor hujjatni yuklab oling.

Bunda shuni inobatga olish muhimki, maʼlumotnoma tizimda faqat tegishli muassasada tibbiy ko‘rikdan o‘tgandan so‘ng shakllantiriladi. Shifokorlarning xulosalari maʼlumotlar bazasiga kiritilgandan so‘ng, hujjatni masofadan turib olish mumkin bo‘ladi.