“Qishloq xo‘jaligi ishlab chiqaruvchilarining yerdan foydalanishdagi mustaqilligini taʼminlashga qaratilgan navbatdagi chora-tadbirlar to‘g‘risida”gi Prezident Farmoni (PF–68-son, 24.04.2026 y.) qabul qilindi.

Farmonga ko‘ra, 2026 yil 1 maydan respublikaning barcha hududlaridagi qishloq xo‘jaligiga mo‘ljallangan yer uchastkalari O‘zbekiston Respublikasi Prezidentining 2025 yil 3 fevraldagi PF–18-son Farmonida belgilangan tartibda realizatsiya qilinadi, bunda:

► Qoraqalpog‘iston Respublikasi Vazirlar Kengashi Raisi va viloyatlar hokimlarining taklifiga asosan 50 gektardan – 500 gektargacha o‘lchamdagi yer uchastkalarini faqat sanoat usulidagi plantatsiyalar tashkil qilish va chorvachilik uchun yer uchastkasidan ruxsat etilgan foydalanish turini belgilagan holda auksion savdolariga chiqarishga yo‘l qo‘yiladi;

► auksion savdolariga chiqariladigan yer uchastkalarining boshlang‘ich narxi yer uchastkasi normativ qiymatining 50 foizi miqdorida belgilanadi, har bir takroriy savdoda sotilmagan lot narxi 10 foizdan bosqichma-bosqich boshlang‘ich narxning 10 foizi miqdoriga (yer uchastkasini auksion savdolariga chiqarish xarajatlaridan kam bo‘lmagan miqdoriga) qadar pasaytiriladi;

► birinchi auksion savdosi tegishli yer uchastkasi haqidagi xabarnoma eʼlon qilingan kundan boshlab 15 kun muddatda va takroriy savdolar 1 kun muddatda o‘tkaziladi.

✅ Yaylovlar, pichanzorlar va lalmi yer maydonlari auksion savdolariga chiqarilganda lotning boshlang‘ich narxi yer uchastkasi normativ qiymatining 1 foizi hamda yer uchastkasini auksionga chiqarish, yerlarni foydalanishga kiritish bo‘yicha yer tuzish loyihasi va texnik-iqtisodiy asosni ishlab chiqish xarajatlari hamda ijara huquqini davlat ro‘yxatidan o‘tkazish uchun to‘lov miqdoriga teng summada belgilanadi.

Qishloq xo‘jaligi sohasidagi yirik investitsiya loyihalariga yer uchastkalarini ajratish jarayonlari soddalashtiriladi

Farmonga ko‘ra, yer uchastkalarini paxtachilik va g‘allachilik ixtisosligi bo‘yicha ijaraga olgan subyektlar jami yer uchastkasining 50 foiz qismiga nisbatan ijara huquqidan ixtiyoriy ravishda voz kechganda yer uchastkasining o‘zida qoladigan qismi uchun yangi tizimda belgilangan huquqlar, majburiyatlar va yangidan 49 yilga ijara huquqiga ega bo‘ladi va bunda subyektlarning:

► qishloq xo‘jaligi ekinlarini yetishtirish uchun tijorat banklaridan olingan kredit va soliqlardan qarzdorligi bo‘lmasligi;

► yer uchastkalariga bo‘lgan ijara huquqlari tijorat banklariga garov taʼminoti sifatida qo‘yilmagan bo‘lishi talabi qo‘yiladi.

Qiymati kamida 10 mln AQSH dollari ekvivalentida eng yaxshi taklifni tanlab olish yo‘li bilan aniqlanadigan yirik investitsiya loyihasini amalga oshirish uchun qishloq xo‘jaligiga mo‘ljallangan yer uchastkalari:

► mahalliy investorlarga 49 yil muddatga va “Ijaraga berilgan qishloq xo‘jaligi yerlariga xizmat ko‘rsatish direksiyasi”ga 25 yil muddatga Vazirlar Mahkamasi tomonidan (Qoraqalpog‘iston Respublikasida 2027 yil 31 dekabrga qadar Qoraqalpog‘iston Respublikasi Vazirlar Kengashi tomonidan ham) belgilangan tartibda to‘g‘ridan-to‘g‘ri ijaraga beriladi.

2027 yildan sholi yetishtirishda anʼanaviy (sepma) usuldan to‘liq voz kechib, sholini faqat lazerli tekislangan maydonlarga ko‘chat usulida hamda zamonaviy don ekish seyalkalari orqali ekish tartibi joriy etiladi.