O‘zbekistonda Amazon Leo yuqori tezlikdagi sunʼiy yo‘ldosh interneti xizmatlari joriy etiladi.

16–18 iyun kunlari poytaxtda bo‘lib o‘tayotgan Beshinchi Toshkent xalqaro investitsiya forumi doirasida telekommunikatsiya sohasida muhim kelishuv imzolandi. 

Forum doirasida AQSHning Amazon kompaniyasiga qarashli Amazon Leo hamda “UZ-SAT” QK MCHJ o‘rtasida O‘zbekiston hududida yuqori tezlikdagi sunʼiy yo‘ldosh internet xizmatlarini tarqatish bo‘yicha kelishuv imzolandi.

Loyiha doirasida Amazon Leo sunʼiy yo‘ldosh aloqa tarmog‘i orqali yuqori tezlikdagi internet xizmatlari taqdim etiladi. Bu xizmatlardan nafaqat shaharlarda, balki telekommunikatsiya infratuzilmasi cheklangan yoki mavjud bo‘lmagan olis va borish qiyin bo‘lgan hududlarda ham foydalanish mumkin bo‘ladi.

Maʼlum qilinishicha, Amazon Leo tizimi 3 mingdan ortiq sunʼiy yo‘ldoshdan iborat guruhga asoslangan bo‘lib, ular yuqori tezlikdagi optik aloqa orqali o‘zaro bog‘langan. Tizim yer ustidagi xavfsiz global shlyuz stansiyalari, tolali-optik tarmoqlar va internet aloqa nuqtalari bilan integratsiya qilingan.

Foydalanuvchilar Amazon Leo Nano, Amazon Leo Pro va Amazon Leo Ultra antennalari orqali tarmoqqa ulanib, dunyoning deyarli istalgan nuqtasida keng polosali yuqori tezlikdagi internet xizmatlaridan foydalanish imkoniyatiga ega bo‘ladi.

Mutasaddilarning taʼkidlashicha, mazkur kelishuv mamlakatning raqamli infratuzilmasini rivojlantirish, internet qamrovini kengaytirish va olis hududlardagi aholining raqamli xizmatlardan foydalanish imkoniyatlarini oshirishga xizmat qiladi.