Bugun “Madad” NNT Ijrochi direktori Sh.Saidov Buyuk Britaniyaning O‘zbekistondagi elchixonasi vakili Xellen xonim bilan muhim uchrashuv o‘tkazdi. Unda "Ijtimoiy himoyaga muhtoj aholiga bepul yuridik yordam ko‘rsatish va odil sudlovdan foydalanishni kengaytirish" nomli istiqbolli loyihaning amalga oshirish mexanizmlari batafsil muhokama qilindi.

Uchrashuv davomida loyiha doirasida quyidagi muhim yo‘nalishlar bo‘yicha fikrlar almashildi va amalga oshirish mexanizmlari ko‘rib chiqildi:

1."Xotin-qizlarga ko‘mak": Ayollarning huquqiy savodxonligini oshirish va ularga bepul yuridik maslahatlar berish.

2."Keksalarga ko‘mak": Yoshi ulug‘ fuqarolarning huquqiy ehtiyojlarini qondirishga qaratilgan yordam.

3."Yoshlarga ko‘mak": Yoshlarni huquqiy jihatdan qo‘llab-quvvatlash va ularning odil sudlovdan foydalanishini kengaytirish.

4."Huquqiy yordam vaucheri" tizimi: Ijtimoiy himoyaga muhtoj qatlamga sifatli huquqiy yordam ko‘rsatish uchun samarali mexanizm.

5. Mahalla vakillari uchun treninglar o‘tkazish va qo‘llanma ishlab chiqish: Aholiga huquqiy yordam ko‘rsatishda mahalla institutining rolini kuchaytirish.

6. "Pro bono" loyihasini rivojlantirish: Ko‘ngilli yuristlarni jalb qilgan holda bepul huquqiy xizmatlarni kengaytirish.

7. “Madad” NNT xodimlari uchun o‘quv treninglar o‘tkazish: Loyiha ishtirokchilarining malakasini oshirish va xizmat ko‘rsatish sifatini yaxshilash.

Uchrashuv o‘zaro fikr almashish va loyihaning muvaffaqiyatli ijrosini taʼminlash borasidagi hamkorlikni mustahkamlash ruhida o‘tdi. “Madad” NNT jamoasi ushbu xayrli ishda Buyuk Britaniya elchixonasi bilan hamkorlikdan g‘ururlanadi va loyihaning aholi farovonligiga katta hissa qo‘shishiga ishonadi.