Mamlakat fuqarolarining chet elda ishlashini yengillashtirish, ularga qulay shart-sharoit yaratish, mehnat migratsiyasidan qaytganlarni ish bilan taʼminlash va qayta jamiyatga moslashishlariga yordam berish maqsadida Tashqi mehnat migratsiyasi agentligi tashkil etildi. Bu agentlik Kambag‘allikni qisqartirish va bandlik vazirligi huzurida faoliyat yuritadi. Quyida “Xorijda ish” platformasining qulayliklari haqida 5 ta muhim fakt keltirib o‘tamiz.

1. Mehnat migrantlariga moliyaviy yordam ko‘rsatilyapti

“Xorijda ish” elektron platformasida ro‘yxatdan o‘tgan va tashkillashtirilgan mehnat migratsiyasi orqali chet elga ishlashga ketayotgan fuqarolarga moliyaviy yordam ko‘rsatilmoqda. Ular xorijiy til yoki kasbiy malaka imtihonlarini muvaffaqiyatli topshirib, sertifikat olgan taqdirda — bazaviy hisoblash miqdorining 3 baravarigacha, ishchi viza rasmiylashtirish xarajatlari uchun 5 baravarigacha, va yo‘l chiptasi uchun 2 baravarigacha kompensatsiya olish huquqiga ega. Bu mexanizm migratsiya xarajatlarini kamaytirish va fuqarolarni qo‘llab-quvvatlashga qaratilgan.

2. Kam taʼminlanganlar uchun sug‘urta xarajatlari qoplab beriladi

Tashkillashtirilgan mehnat migratsiyasiga ketayotgan va “Temir daftar”, “Ayollar daftari”, “Yoshlar daftari” yoki “Kambag‘al oilalar reyestri”ga kiritilgan fuqarolarning hayoti, sog‘lig‘i va boshqa tavakkalchiliklarini sug‘urtalash uchun davlat tomonidan subsidiya ajratiladi. Har bir sug‘urtalangan fuqaro uchun yiliga 300 ming so‘mgacha miqdordagi sug‘urta mukofoti davlat hisobidan qoplab beriladi. Bu orqali kam taʼminlangan aholi qatlamiga mehnat migratsiyasida xavfsizlik va moliyaviy himoya kafolati yaratiladi.

3. Huquqlari buzilgan fuqarolarga yuridik yordam ko‘rsatiladi

Chet elda ishlash davomida zo‘ravonlik, majburiy mehnat, kamsitish yoki huquqbuzarliklarga duchor bo‘lgan, shuningdek murakkab moliyaviy ahvolda qolgan, hujjatlarisiz va yashash uchun mablag‘siz bo‘lgan O‘zbekiston fuqarolariga advokat, yuridik yoki huquqni muhofaza qiluvchi tashkilotlar xizmatlari uchun davlat tomonidan to‘lov amalga oshiriladi. Bu bilan ularning huquqiy himoyasi taʼminlanadi. Shuningdek, Kambag‘allikni qisqartirish va bandlik vazirligi manfaatdor idoralar bilan birgalikda subsidiya va kompensatsiya tartibini ikki oy muddatda belgilab berishi lozim.

 4. Og‘ir ahvolda qolgan migrantlar uchun markazlar ochiladi

Mehnat migrantlarini moddiy va huquqiy jihatdan yana-da samarali qo‘llab-quvvatlash maqsadida Buyuk Britaniya (London), Germaniya (Berlin), Turkiya (Istanbul) va Saudiya Arabistoni (Ar-Riyod) shaharlarida Tashqi mehnat migratsiyasi agentligining vakolatxonalari yoki huquqiy himoya markazlarini ochish belgilangan. Bu tashabbus doirasida tegishli mamlakatlar bilan muzokaralar olib boriladi. Markazlar orqali og‘ir vaziyatga tushib qolgan fuqarolarga huquqiy, axborot va moddiy yordam ko‘rsatilishi ko‘zda tutilgan.

5. Mehnat migrantlari uchun maxsus mobil ilova yaratiladi

Mehnat migrantlariga amaliy yordam ko‘rsatishni yana-da osonlashtirish maqsadida maxsus mobil ilova yaratish rejalashtirilgan. Ushbu ilova orqali fuqarolar:

bo‘lib turgan mamlakatdagi boshqa vatandoshlar bilan onlayn muloqot qilishi, o‘sha mamlakatdagi bo‘sh ish o‘rinlari to‘g‘risida maʼlumot olishi,pul o‘tkazmalari amalga oshirishi va og‘ir hayotiy ahvolga tushib qolganda yordam ko‘rsatuvchi tashkilotlar bilan bog‘lanishi mumkin bo‘ladi.

Bu ilova mehnat migrantlarining huquqiy, moliyaviy va axborotga bo‘lgan ehtiyojlarini qamrab oluvchi samarali vosita bo‘lib xizmat qiladi.

Yuqorida keltirilgan 5 ta fakt mehnat migratsiyasini samarali tashkil etish va fuqarolarni qo‘llab-quvvatlash borasida davlat tomonidan amalga oshirilayotgan aniq va maqsadli chora-tadbirlardan dalolat beradi. Tashqi mehnat migratsiyasi agentligi faoliyati, moliyaviy yordam mexanizmlari, sug‘urta va huquqiy himoya, shuningdek, xorijdagi vakolatxonalar va mobil ilova kabi tashabbuslar mehnat migrantlarining huquqlari, xavfsizligi va farovonligini taʼminlashga xizmat qiladi. Bu esa fuqarolarning chet elda ishlash imkoniyatlarini kengaytirish, ularning qonuniy va shaffof tarzda xorijiy mehnat bozoriga chiqishiga turtki bo‘ladi.