Ko‘rish, eshitish va nutqida nuqsoni bo‘lgan shaxslarga ta’lim sohasidagi imtiyozlar

Xorijiy til sertifikati talab etilmaydi

Davlat oliy ta’lim tashkilotlarining:

magistratura mutaxassisliklariga;
oliy ta’limdan keyingi ta’lim ixtisosliklariga

o‘qishga qabul qilishda ko‘rish, eshitish va nutqida nuqsoni bo‘lgan shaxslardan xorijiy tilni bilish bo‘yicha milliy yoki unga tenglashtirilgan xalqaro sertifikat talab etilmaydi.

Kirish imtihonida surdotarjimon xizmati

Oliy ta’lim tashkilotlariga kirish imtihonlarida ishtirok etayotgan eshitish va nutqida nuqsoni bo‘lgan abiturientlar surdotarjimon xizmati bilan majburiy tartibda ta’minlanadi.

Chet tili imtihoni uchun chegirma

Chet tilini bilish darajasini aniqlash bo‘yicha malaka imtihonida ishtirok etishda:

I va II guruh nogironligi bo‘lgan shaxslar;
nogironligi bo‘lgan bolalar;
Ijtimoiy reestrning «kambag‘al oila» toifasiga kiritilgan oilalar a’zolari

uchun belgilangan to‘lovga 50 foiz chegirma qo‘llaniladi.

Ijtimoiy reestrning «davlat ta’minotidagi oila» toifasiga kiritilgan oilalar a’zolariga esa 75 foiz chegirma beriladi.

Imtihonning maxsus shakli

Nogironligi bo‘lgan talabgorlar uchun chet tili bo‘yicha malaka imtihoni bir bosqichda, maxsus dastur orqali kompьyuterda o‘tkaziladi.

Bunda:

ko‘zi ojiz talabgorlar — «tinglab tushunish» va «gapirish» bo‘limlarini;
eshitish va gapirishda nuqsoni bo‘lgan talabgorlar — «o‘qish» va «yozish» bo‘limlarini;
yozish imkoniyati cheklangan talabgorlar — «tinglab tushunish», «o‘qish» va «gapirish» bo‘limlarini topshiradi.

Zarur hollarda talabgorga vakolatli organ tomonidan yordamchi — assistent biriktiriladi. Maxsus formatda olingan sertifikat umumiy tartibda berilgan tegishli darajadagi sertifikat bilan teng kuchga ega.

Imo-ishora tilini biladigan pedagoglar

Kar va zaif eshituvchi bolalar uchun ixtisoslashtirilgan ta’lim muassasalarida o‘qituvchi lavozimiga dars olib boriladigan imo-ishora tilini biladigan pedagog kadrlar qabul qilinadi.

Normativ hujjatlar

O‘zbekiston Respublikasi Prezidentining 2022-yil 20 oktyabrdagi PQ–407-son qarori

O‘zbekiston Respublikasi Vazirlar Mahkamasining 2022-yil 16-fevraldagi 73-son qarori

Maqola foydali bo‘ldimi?

Bo‘limlar