“Қишлоқ хўжалиги ишлаб чиқарувчиларининг ердан фойдаланишдаги мустақиллигини таъминлашга қаратилган навбатдаги чора-тадбирлар тўғрисида”ги Президент Фармони (ПФ–68-сон, 24.04.2026 й.) қабул қилинди.

Фармонга кўра, 2026 йил 1 майдан республиканинг барча ҳудудларидаги қишлоқ хўжалигига мўлжалланган ер участкалари Ўзбекистон Республикаси Президентининг 2025 йил 3 февралдаги ПФ–18-сон Фармонида белгиланган тартибда реализация қилинади, бунда:

► Қорақалпоғистон Республикаси Вазирлар Кенгаши Раиси ва вилоятлар ҳокимларининг таклифига асосан 50 гектардан – 500 гектаргача ўлчамдаги ер участкаларини фақат саноат усулидаги плантациялар ташкил қилиш ва чорвачилик учун ер участкасидан рухсат этилган фойдаланиш турини белгилаган ҳолда аукцион савдоларига чиқаришга йўл қўйилади;

► аукцион савдоларига чиқариладиган ер участкаларининг бошланғич нархи ер участкаси норматив қийматининг 50 фоизи миқдорида белгиланади, ҳар бир такрорий савдода сотилмаган лот нархи 10 фоиздан босқичма-босқич бошланғич нархнинг 10 фоизи миқдорига (ер участкасини аукцион савдоларига чиқариш харажатларидан кам бўлмаган миқдорига) қадар пасайтирилади;

► биринчи аукцион савдоси тегишли ер участкаси ҳақидаги хабарнома эълон қилинган кундан бошлаб 15 кун муддатда ва такрорий савдолар 1 кун муддатда ўтказилади.

✅ Яйловлар, пичанзорлар ва лалми ер майдонлари аукцион савдоларига чиқарилганда лотнинг бошланғич нархи ер участкаси норматив қийматининг 1 фоизи ҳамда ер участкасини аукционга чиқариш, ерларни фойдаланишга киритиш бўйича ер тузиш лойиҳаси ва техник-иқтисодий асосни ишлаб чиқиш харажатлари ҳамда ижара ҳуқуқини давлат рўйхатидан ўтказиш учун тўлов миқдорига тенг суммада белгиланади.

Қишлоқ хўжалиги соҳасидаги йирик инвестиция лойиҳаларига ер участкаларини ажратиш жараёнлари соддалаштирилади

Фармонга кўра, ер участкаларини пахтачилик ва ғаллачилик ихтисослиги бўйича ижарага олган субъектлар жами ер участкасининг 50 фоиз қисмига нисбатан ижара ҳуқуқидан ихтиёрий равишда воз кечганда ер участкасининг ўзида қоладиган қисми учун янги тизимда белгиланган ҳуқуқлар, мажбуриятлар ва янгидан 49 йилга ижара ҳуқуқига эга бўлади ва бунда субъектларнинг:

► қишлоқ хўжалиги экинларини етиштириш учун тижорат банкларидан олинган кредит ва солиқлардан қарздорлиги бўлмаслиги;

► ер участкаларига бўлган ижара ҳуқуқлари тижорат банкларига гаров таъминоти сифатида қўйилмаган бўлиши талаби қўйилади.

Қиймати камида 10 млн АҚШ доллари эквивалентида энг яхши таклифни танлаб олиш йўли билан аниқланадиган йирик инвестиция лойиҳасини амалга ошириш учун қишлоқ хўжалигига мўлжалланган ер участкалари:

► маҳаллий инвесторларга 49 йил муддатга ва “Ижарага берилган қишлоқ хўжалиги ерларига хизмат кўрсатиш дирекцияси”га 25 йил муддатга Вазирлар Маҳкамаси томонидан (Қорақалпоғистон Республикасида 2027 йил 31 декабрга қадар Қорақалпоғистон Республикаси Вазирлар Кенгаши томонидан ҳам) белгиланган тартибда тўғридан-тўғри ижарага берилади.

2027 йилдан шоли етиштиришда анъанавий (сепма) усулдан тўлиқ воз кечиб, шолини фақат лазерли текисланган майдонларга кўчат усулида ҳамда замонавий дон экиш сеялкалари орқали экиш тартиби жорий этилади.