Об-ҳаво шароитининг кескин ўзгариши туфайли Тошкент шаҳри ва Фарғона водийси вилоятларини боғловчи Қамчиқ довони вақтинча ёпилди. Бу ҳақда Йўл ҳаракати хавфсизлиги хизмати хабар берди.

Қайд этилишича, об-ҳаводаги кескин ўзгариш: кучли қор ёғиши ва кўчки хавфи юзага келгани боис 10 декабрь куни соат 02:30 дан бошлаб довонда транспорт воситаларининг ҳаракати вақтинча тўхтатилган.

Айни дақиқаларда ФВВ раҳбарлигида тегишли ташкилотларнинг мутахассислари томонидан вазият оқибатларини бартараф этиш борасида кенг кўламли профилактик тадбирлар амалга оширилмоқда.

ЙҲХХ довон йўли очилиши бўйича қўшимча маълумот берилишини маълум қилди.

Аввалроқ Ўзгидромет 10−12 декабрь кунлари Тошкент ва Наманган вилоятларининг тоғли ҳудудларида қор кўчиши хавфи борлигини эълон қилганди.

Эслатиб ўтамиз, бу ҳафта бошида Ўзбекистоннинг кўплаб вилоятларда жуда кўп ёмғир, тоғ ва тоғ этакларида қор бўронлари бўлиши кутилмоқда. Узоқ кузатилган қурғоқчил мавсумдан сўнг минтақага жуда катта намлик кириб келмоқда.