Ноябрдан бошлаб президент ҳузуридаги Тадбиркорликни қўллаб-қувватлаш бўйича жамоатчилик кенгаши таркибида Корпоратив этика комиссияси иш бошлайди. У компанияларга тавсиялар беради, этика кодексини ишлаб чиқади ва корпоратив низоларни судга мурожаат қилмасдан ҳал қилади.

Ўзбекистонда масъулияти чекланган жамиятлар (МЧЖ) иштирокчиларининг кириш-чиқишининг соддалаштирилган механизми жорий этилмоқда. Бу президентнинг 5 сентябрдаги қарорида кўзда тутилган.

Ҳужжатга кўра, энди кўп ҳолларда иштирокчининг МЧЖ таркибига киритилиши ёки чиқарилиши эндиликда ҳаракат ҳақиқатда амалга оширилган ёки воқеа содир бўлган пайтдан, масалан, суд қарори қонуний кучга кирган пайтдан, мерос ҳуқуқи тўғрисидаги гувоҳнома тақдим этилгандан ёки битим E-auksion ёки нотариус орқали амалга оширилган пайтдан бошлаб содир бўлган ҳисобланади.

Жамиятларга энди аъзолик таркибидаги ўзгаришларни рўйхатга олиш учун умумий йиғилиш қарори талаб қилинмайди — бошқа иштирокчиларни хабардор қилиш ва ўзгаришларни Ягона давлат реестрига киритиш кифоя. Агар жамият 30 кун ичида реестрга ўзгартиришларни киритмаса, манфаатдор шахс буни мустақил равишда амалга ошириши мумкин.

Бироқ солиқ қарзининг мавжудлиги рўйхатга олишни рад этиш учун асос бўла олмайди.

Шунингдек, давлат иштирокидаги корхоналар ва давлат муассасалари ихтиёрий равишда тугатилиши ёки муассисларнинг қарори билан Давлат активларини бошқариш агентлиги билан келишилган ҳолда қайта ташкил этилиши мумкинлиги белгиланди.

Корпоратив ахлоқ комиссияси

2025 йил 1 ноябрдан президент ҳузуридаги Тадбиркорликни қўллаб-қувватлаш бўйича жамоатчилик кенгаши ҳузурида Корпоратив этика комиссияси ташкил этилади. У корпоратив этика кодексини ишлаб чиқишда, шунингдек, низоларни судгача ҳал қилишда компанияларга тавсия ва ёрдам беради. Савдо-саноат палатаси комиссиянинг ишчи органи этиб белгиланди.

Президент ҳузурида 2022 йилда Тадбиркорликни қўллаб-қувватлаш бўйича жамоатчилик кенгаши ташкил этилганди. 2024 йил декабрь ойида тадбиркорлар билан учрашувда Шавкат Мирзиёев кенгаш таркибида IT, финтех, бизнесни молиялаштириш, экспорт, туризм, хизмат кўрсатиш, яширин иқтисодиётни қисқартириш йўналишлари бўйича эксперт гуруҳларини ташкил этишни таклиф қилган.

Тадбиркорлик субъектларини давлат рўйхатидан ўтказишнинг автоматлаштирилган тизимида юридик шахсларнинг таъсисчилари (иштирокчилари) улушлари тўғрисидаги маълумотларни доимий равишда янгилаб бориш онлайн хизмати жорий этилмоқда. Ушбу маълумотлар иштирокчиларнинг ўзлари учун очиқ бўлади, шунингдек, ўзларига тегишли улушни бегоналаштиришга тақиқ қўйиш имконияти пайдо бўлади.

Адлия вазирлиги 2026 йилнинг мартига қадар МЧЖ иштирокчилари улушни сотиб олиш бўйича имтиёзли ҳуқуқини амалга ошириш ва бундай ҳуқуқдан воз кечиш тўғрисида электрон тарзда хабардор қилинишини, шунингдек, Notarius тизими билан интеграциялашувини таъминлайди.