Ўзбекистондаги автомобилларга газ тўлдириш компрессор шохобчаларида UGaz тизими ишга туширилмоқда. У АГТКШдаги жараёнларни реал вақт режимида қайд этиб боради, автомобилларнинг техник кўрикдан ўтгани, ёнилғи тури мослиги ёки баллон рўйхатдан ўтказилгани кабиларни автоматик текширади.

Ўзбекистонда «Ягона интегратор Uzinfocom» томонидан автомобилларга газ тўлдириш компрессор шохобчаларидаги (АГТКШ) жараённи реал вақт режимида қайд этиб борадиган UGaz тизими жорий этилди. Бу ҳақда Энергетика вазирлиги ахборот хизмати хабар қилди.

Тизимни ўрнатиш 2024 йилнинг 6 июлида қабул қилинган «Табиий газ ресурсларидан оқилона фойдаланиш чора-тадбирлари тўғрисида»ги Вазирлар Маҳкамаси қарорига мувофиқ АГТКШлар орқали сиқилган газни сотиш учун лицензия олиш талабларидан бири этиб белгиланган.

Таъкидланишича, UGaz тизими ҳар бир газ қуйиш шохобчасида жараённи реал вақт режимида қайд этиш билан бирга:

• қўлда ҳисоб-китоб олиб бориш заруратини камайтиради;
• ноқонуний ҳолатларнинг олдини олади;
• жараён шаффофлигини таъминлайди;
• истеъмолчилар учун хавфсизлик даражасини оширади.

Автомобиль ГҚШга кирган вақтда унинг техник кўрикдан ўтгани автоматик тарзда текширилади. Агар техник кўрик муддати тугаган бўлса, тизим операторга хабар беради. Шунингдек, ёнилғи тури мос келмаган ёки баллон рўйхатдан ўтказилмаган тақдирда, тизим операторни шу жойнинг ўзида огоҳлантиради. Бу орқали АГТШК, ҳайдовчи ва йўловчилар хавфсизлиги таъминланади, дейилади хабарда.

«Тизим орқали ГҚШ қабул қилиб олаётган газ ҳажмларининг аниқ ҳисоб-китоби юритилади. Бу эса ГҚШларнинг табиий газдан ноқонуний фойдаланиш ҳолатларининг олдини олишга хизмат қилади ва газ сотиш жараёнларининг шаффофлигини таъминлайди».

Бундан ташқари, АГТКШлардаги ҳар бир газ тўлдириш колонкаси ва ундаги ходим фаолияти онлайн назорат қилинади. АГТКШ ходимларининг барча хизмат кўрсатиш жараёнлари манфаатдор вазирлик ва идоралар (Ички ишлар вазирлиги, Давлат солиқ қўмитаси, «Тошшаҳартрансхизмат» АЖ, Электрон ҳукумат тизимлари, «Энергоназорат» платформаси ва OneID) билан интеграция қилинган.