Келишув доирасида седанлардан тортиб то тўлиқ ўлчамли кроссоверларгача бўлган моделларни ишлаб чиқариш режалаштирилган. Оммавий ишлаб чиқаришни бошлаш йил охирига режалаштирилган.

IV Тошкент Халқаро Инвестиция Форуми доирасида Volkswagen AG ва “Ўзавтосаноат” АЖ таркибий корхонаси — Alyans Auto компанияси ўртасида замонавий енгил автомобиллар, седанлардан тортиб то тўлиқ ўлчамли кроссоверларгача бўлган модель қаторини кенгайтириш бўйича янги келишув имзоланди. Бу ҳақда “Ўзавтосаноат” АЖ Матбуот хизмати хабар қилди.

Барча моделлар маҳаллий бозор шароитлари ва истеъмолчилар талабларига мослаштирилади.

Имзоланган келишув ҳамкорликнинг изчиллиги ва стратегик йўналишини акс эттириб, муваффақиятли ҳамкорликнинг мантиқий давоми ва Volkswagen брендининг минтақадаги барқарор ривожланиш йўлидаги муҳим қадами бўлди.

“Минтақанинг юрагида жойлашган Ўзбекистон автомобиль ишлаб чиқариш ва экспортини ташкил этиш учун кенг имкониятлар очади. Ушбу ҳамкорликни биз Volkswagen’ннинг бозордаги барқарор иштирокини кенгайтириш йўлидаги муҳим қадам деб биламиз”, — деди Volkswagen AG Бошқарув кенгашининг савдо, маркетинг ва сотувдан кейинги хизмат кўрсатиш бўйича аъзоси Мартин Сандер.

Лойиҳа доирасида янги ишлаб чиқариш қувватларини ишга тушириш, маҳаллийлаштириш даражасини ошириш, технологияларни узатиш ва мамлакатнинг автомобиль саноати экспорт салоҳиятини ривожлантириш режалаштирилган.

Оммавий ишлаб чиқаришни бошлаш 2025 йил IV чорагига мўлжалланган.

Маълумот учун, 2019 йилдан бошлаб корхона "Жиззах Ауто" бренди остида Volkswagen ва Skoda расмий ишлаб чиқарувчиси ва дистрибьютори сифатида фаолият кўрсатди. Volkswagen компаниясининг BPDD корпоратив аудити натижаларига кўра, 2025 йилда компания сифат ва мижозларга йўналтирилган стандартларга содиқ қолган ҳолда Alyans Auto номи остида ребрендинг ва фаолиятини давом эттирди.