Автомобилни ЙҲХХ ва нотариусда расмийлаштириш харажатлари

Автомототранспорт воситасига мулк ҳуқуқи пайдо бўлган ёки бошқа шахсга ўтган кундан бошлаб унинг эгаси ёки вакили 10 календарь кун ичида транспорт воситасини давлат рўйхатидан ўтказиш учун Йўл ҳаракати хавфсизлиги хизматига мурожаат қилиши керак.

Қуйидаги ҳисоб-китоблар амалдаги базавий ҳисоблаш миқдори — 412 000 сўм асосида келтирилган.

Бензинли, дизелли ва бошқа оддий автомобилларни рўйхатдан ўтказиш

Электромобил, мототранспорт воситаси ва тиркамалардан бошқа автомобиллар учун:

• давлат рўйхатидан ўтказиш ёки қайта рўйхатдан ўтказиш — БҲМнинг 6,84 баравари, яъни 2 818 080 сўм;
• транспорт воситаси рўйхатдан ўтказилганлиги тўғрисида гувоҳнома — техпаспорт бериш — БҲМнинг 0,7 баравари, яъни 288 400 сўм;
• оддий давлат рақами белгиларини бериш — БҲМнинг 3,5 баравари, яъни 1 442 000 сўм.

Жами — 4 548 480 сўм.

Мазкур ҳисобга махсус ёки оширилган тўловли давлат рақамини танлаш, ЙҲХХ ходимининг манзилга чиқиши ва бошқа қўшимча хизматлар киритилмаган.

Электромобилни рўйхатдан ўтказиш

Электромобиллар учун:

• давлат рўйхатидан ўтказиш ёки қайта рўйхатдан ўтказиш — БҲМнинг 1,5 баравари, яъни 618 000 сўм;
• техпаспорт бериш — БҲМнинг 0,7 баравари, яъни 288 400 сўм;
• оддий давлат рақами белгиларини бериш — БҲМнинг 3,5 баравари, яъни 1 442 000 сўм.

Жами — 2 348 400 сўм.

Электромобилларни рўйхатдан ўтказиш ва қайта рўйхатдан ўтказиш учун алоҳида 1,5 БҲМ миқдоридаги ставка белгиланган.

Янги автомобил учун нотариус керакми?

Янги автомобиль расмий дилердан олди-сотди шартномаси ёки электрон ҳисоб-фактура асосида сотиб олинганда, уни нотариусда алоҳида расмийлаштириш, одатда, талаб этилмайди.

Бундай ҳолда харидор асосан:

• транспорт воситасини давлат рўйхатидан ўтказиш;
• техпаспорт олиш;
• давлат рақами белгисини олиш

билан боғлиқ тўловларни амалга оширади.

Ишлатилган автомобилни нотариусда расмийлаштириш

Жисмоний шахсдан ишлатилган автомобиль сотиб олинганда олди-сотди шартномаси нотариал тартибда тасдиқланади.

Автомототранспорт воситасини бошқа шахсга ўтказиш шартномасини тасдиқлаш учун давлат божи:

• БҲМнинг 3 баравари;
• амалдаги БҲМ бўйича 1 236 000 сўм

миқдорида ундирилади.

Бундан ташқари, нотариус томонидан кўрсатиладиган ҳуқуқий ва техник тусдаги қўшимча хизматлар учун тўловлар ундирилиши мумкин. Жумладан:

• шартнома лойиҳасини тайёрлаш;
• тақиқ ёки хатлов мавжудлигини текшириш;
• ҳуқуқий тушунтириш бериш;
• электрон сўровлар юбориш;
• гербли бланка ва бошқа техник хизматлар.

Шу сабабли нотариусдаги якуний тўлов фақат давлат божидан эмас, балки амалда кўрсатилган қўшимча хизматлардан ҳам шаклланади.

Нотариусдаги тахминий умумий харажат

Саҳифада келтирилган қўшимча хизматлар сақланганда ҳисоб-китоб қуйидагича бўлади:

• давлат божи — 3 БҲМ: 1 236 000 сўм;
• гербли бланка ёки тегишли техник тўлов — 0,1 БҲМ: 41 200 сўм;
• тақиқ ва хатловни текшириш — 0,15 БҲМ: 61 800 сўм;
• ҳуқуқий маслаҳат — 0,05 БҲМ: 20 600 сўм;
• шартнома лойиҳасини тайёрлаш — 0,1 БҲМ: 41 200 сўм.

Тахминий жами — 1 400 800 сўм.

Нотариусдаги аниқ якуний сумма шартнома тури, тарафлар ўртасидаги қариндошлик, қўлланиладиган имтиёзлар ва амалда кўрсатилган қўшимча хизматларга қараб фарқ қилиши мумкин.

Яқин қариндошлар ўртасидаги шартнома

Автомобиль:

• эр ёки хотинга;
• ўзининг ёки эрининг — хотинининг ота-онасига;
• фарзандларига ва уларнинг эр-хотинига;
• невараларига;
• бобоси ёки бувисига;
• ака-укаси ёки опа-синглисига

ўтказилганда давлат божи белгиланган умумий ставканинг 5 фоизи миқдорида ундирилади.

Банк кредити ҳисобидан автомобиль сотиб олиш шартномасида эса давлат божи белгиланган ставканинг 10 фоизи миқдорида тўланади.

Умумий харажат қанча бўлади?

Ишлатилган бензинли ёки дизелли автомобиль бошқа шахсдан сотиб олиниб, янги давлат рақами олинса:

• нотариусда расмийлаштириш — тахминан 1 400 800 сўм;
• ЙҲХХда расмийлаштириш — 4 548 480 сўм.

Умумий тахминий харажат — 5 949 280 сўм.

Ишлатилган электромобиль сотиб олиниб, янги давлат рақами олинса:

• нотариусда расмийлаштириш — тахминан 1 400 800 сўм;
• ЙҲХХда расмийлаштириш — 2 348 400 сўм.

Умумий тахминий харажат — 3 749 200 сўм.

Агар аввалги давлат рақами қонунчиликда белгиланган тартибда сақлаб қолинса ёки янги рақам олиш талаб қилинмаса, якуний харажат камайиши мумкин.