I ва II гуруҳ ногиронлиги бўлган талабаларни талабалар турар жойига жойлаштириш

Устуворлик ҳуқуқи

Давлат олий таълим муассасаларида таҳсил олаётган I ва II гуруҳ ногиронлиги бўлган талабалар талабалар турар жойига устуворлик асосида қабул қилинади.

Улар умумий навбатдан алоҳида юритиладиган имтиёзли рўйхатга киритилади. Талабалар турар жойида бўш ўрин пайдо бўлганда йўлланма дастлаб имтиёзли рўйхат, сўнг умумий рўйхатдаги навбат бўйича шакллантирилади.

Имтиёзли рўйхатга яна кимлар киритилади?

Устуворлик ҳуқуқи, шунингдек:

етим ва ота-она қарамоғидан маҳрум бўлган талабаларга;
Ижтимоий реестр, «Темир дафтар» ва «Аёллар дафтари»га киритилган оилалар фарзандларига;
«Ёшлар дафтари»да турган талабаларга;
бир оиладан кундузги бакалавриатда тўлов-контракт асосида икки ёки ундан ортиқ фарзанд ўқиётган оила талабаларига;
белгиланган республика ва халқаро танлов ҳамда олимпиада ғолибларига;
талабалар турар жойи кенгаши раиси ёки қават сардори бўлган талабаларга берилади.

Қандай мурожаат қилинади?

Талаба талабалар турар жойига жойлашиш учун:

Давлат хизматлари маркази орқали;
ёки Ягона интерактив давлат хизматлари портали орқали электрон ариза беради.

Ариза бериш ҳар йили 1 августдан бошланиб, ўқув йили якунига қадар давом этади. Давлат хизмати бепул кўрсатилади.

Йўлланма қандай берилади?

Бўш ўрин мавжуд бўлса, махсус ахборот тизимида QR-кодли йўлланма автоматик шакллантирилади.

Олий таълим муассасаси йўлланма келиб тушган ёки тақдим этилган куни талаба билан шартнома тузади ва уни талабалар турар жойига жойлаштиради.

Талаба йўлланма шаклланганидан кейин 10 иш куни ичида шартнома тузмаса ёки дастлабки ойлик тўловни амалга оширмаса, йўлланма бекор қилинади.

Навбатни кузатиш мумкинми?

Талаба:

навбат ҳолатини онлайн кузатиши;
мавжуд бўш ўринлар ҳақида маълумот олиши;
ариза маълумотларини таҳрирлаши;
ЯИДХП ёки Давлат хизматлари маркази орқали мурожаат ҳолатини текшириши мумкин.

Норматив ҳужжатлар

Ўзбекистон Республикаси Вазирлар Маҳкамасининг 14.08.2023 йилдаги 376-сонли қарори