Ногиронлиги бўлган ёшларнинг ўқиш, яшаш ва транспорт харажатларини қоплаш

Кимлар субсидия олиши мумкин?

Субсидияга 14 ёшга тўлган ва 31 ёшга тўлмаган ногиронлиги бўлган шахслар мурожаат қилиши мумкин.

Ушбу ҳуқуқ:

Ўзбекистон Республикаси фуқароларига;
Ўзбекистонда яшаш гувоҳномасига эга чет эл фуқароларига;
фуқаролиги бўлмаган шахсларга татбиқ этилади.

16 ёшга тўлмаган шахс номидан унинг қонуний вакили мурожаат қилади.

Қайси йўналишларда ўқиш учун берилади?

Субсидия нодавлат таълим ташкилотларида:

касб-ҳунар ва касбий кўникмаларни ўрганиш;
ахборот технологиялари ва компьютер дастурлаш;
умумтаълим фанлари;
хорижий тилларни ўрганиш харажатларини қоплаш учун ажратилади.

Субсидия фақат битта ўқув курси учун ва кўпи билан 12 ойга берилади.

Субсидия миқдори

Ўқиш харажатлари учун ҳар ой:

касб-ҳунар, касбий кўникма, ахборот технологиялари ва дастурлашга — 5 БҲМгача;
умумтаълим фанларига — 3 БҲМгача;
хорижий тилларга — 3 БҲМгача субсидия ажратилади.

Ўқиш, яшаш ва транспорт харажатлари учун бир нафар шахсга ажратиладиган умумий субсидия 50 БҲМдан ошмаслиги керак.

Яшаш ва транспорт харажатлари

Яшаш ва транспорт харажатлари фақат ўқиш харажатлари учун субсидия тайинланган шахсларга қоплаб берилади.

Транспорт харажатлари учун субсидия ҳар бир километрга БҲМнинг 0,2 фоизидан ошмаган миқдорда ҳисобланади.

Яшаш харажатларини қоплаш учун ижара шартномаси солиқ органларида ҳисобга қўйилган бўлиши керак. Ижарадаги уй нодавлат таълим ташкилоти жойлашган туман ёки шаҳар ҳудудида бўлиши лозим. Тошкент шаҳри бундан мустасно.

Қандай мурожаат қилинади?

Ариза:

исталган Давлат хизматлари маркази;
ёки Ягона интерактив давлат хизматлари портали орқали берилади.

Давлат хизмати бепул кўрсатилади. Ногиронлик тўғрисидаги маълумотлар давлат ахборот тизимларидан электрон шаклда олинади.

Яшаш ва транспорт харажатлари учун ариза ўқиш бошланганидан кейин ҳар ой якуни бўйича тақдим этилади. Унга йўл харажатларини тасдиқловчи ҳужжатлар ва зарур ҳолда ижара шартномаси илова қилинади.

Субсидия қандай тўланади?

Ўқиш харажатлари учун субсидия нодавлат таълим ташкилотининг ҳисобварағига ўтказилади.

Яшаш ва транспорт харажатлари учун субсидия эса ариза берувчининг банк картасига ўтказилади.

Маҳалладаги ёшлар етакчиси шахснинг ўқиши, ижара манзилида яшаши ва транспортдан фойдаланишини мониторинг қилади.

Муҳим шарт

Субсидия ажратиш ҳақида СМС-хабарнома олган шахс 90 кун ичида нодавлат таълим ташкилоти билан тузилган шартномани тақдим этиши ва ўқишни бошлаши керак. Акс ҳолда субсидия ажратиш рад этилади.

Норматив ҳужжатлар

Ўзбекистон Республикаси Вазирлар Маҳкамасининг 2022 йил 21 июндаги 341-сон қарори