Ногиронлиги бўлган шахсларнинг маданий ҳаётда иштирок этиш ва дам олиш ҳуқуқи

Давлат органлари ва ташкилотлар ногиронлиги бўлган шахсларнинг:

моддий маданий мерос объектларидан;
туристик объектлардан;
спорт объектлари ва иншоотларидан;
дам олиш объектларидан

фойдаланишини таъминлайди.

Театрлар, музейлар, кинотеатрлар, ахборот-кутубхона муассасалари, ахборот-ресурс марказлари, маданият ва истироҳат боғлари ногиронлиги бўлган шахслар фойдаланиши учун қулай бўлиши керак.

Ташкилотларнинг мажбуриятлари

Ташкилотлар ташкилий-ҳуқуқий шаклидан қатъи назар, ногиронлиги бўлган шахсларнинг жамоат бирлашмалари иштирокида:

ногиронлиги бўлган шахслар ва уларнинг оилаларининг маданий, спорт ҳамда туристик тадбирларда иштирок этишига кўмаклашади;
нодавлат нотижорат ташкилотлари билан шерикликда маданий, спорт ва кўнгилочар тадбирларни ташкил этади;
ногиронлиги бўлган шахсларнинг спорт билан шуғулланиши, спорт мусобақаларини ўтказиши ва уларда иштирок этиши учун зарур шарт-шароитлар ҳамда имкониятлар яратади;
ногиронлиги бўлган шахсларни спорт билан шуғулланишга ва жамиятнинг маданий ҳаётига жалб этишга қаратилган нодавлат нотижорат ташкилотларига кўмаклашади;
ногиронлиги бўлган шахсларнинг барча даражадаги спорт тадбирларида иштирок этишини тарғиб қилиш ва рағбатлантиришда иштирок этади.

Объектлардан бепул фойдаланиш

Ташкилотлар ногиронлиги бўлган шахсларнинг спорт иншоотлари, дам олиш ва туристик объектлардан, шу жумладан бепул асосда фойдаланиши учун шарт-шароитлар яратади.

Давлат мулки бўлган жисмоний тарбия-соғломлаштириш ва спорт иншоотлари ногиронлиги бўлган шахсларга спорт билан шуғулланиш учун Ўзбекистон Республикаси Президенти ёки Вазирлар Маҳкамаси ҳужжатларида белгиланган тартибда бепул тақдим этилади.

Паралимпия спортини қўллаб-қувватлаш

Давлат спортнинг паралимпия турлари бўйича:

мураббийларни;
ҳакамларни;
бошқа мутахассисларни

ўқитиш ва тайёрлашни таъминлайди.

Давлат органлари нодавлат нотижорат ташкилотлари, шу жумладан ногиронлиги бўлган шахсларнинг жамоат бирлашмалари билан биргаликда ҳар йили ногиронлиги бўлган шахсларнинг спорт билан шуғулланиши учун шарт-шароитлар яратиш ва уларни спортга жалб этишга доир дастурларни ишлаб чиқади ҳамда амалга оширади.

Давлат ногиронлиги бўлган шахсларнинг спорт билан шуғулланишини моддий жиҳатдан қўллаб-қувватлаш тизимини яратади.

Норматив ҳужжатлар

«Ногиронлиги бўлган шахсларнинг ҳуқуқлари тўғрисида»ги Ўзбекистон Республикасининг 2020 йил 15 октябрдаги ЎРҚ–641-сон Қонуни, 27-модда