O‘zbekiston 2028-yilgacha o‘z sun’iy yo‘ldoshini uchirmoqchi

O‘zbekiston 2028-yilgacha o‘z ilmiy-texnik sun’iy yo‘ldoshini orbitaga chiqarishni rejalashtirmoqda, deb xabar berdi “O‘zbekkosmos” kosmik tadqiqotlar agentligi direktori o‘rinbosari Muhiddin Ibragimov.

Ma’lumotlarga ko‘ra, hozirda mamlakat Ilon Maskka tegishli Amerikaning SpaceX kompaniyasi bilan uchirishni tashkil etish bo‘yicha muzokaralar olib bormoqda. Shuningdek, mutaxassis xalqaro ishga tushirishlar jadvali va ilgari band qilingan vaqtinchalik oynalar bilan bog‘liq cheklovlarni hisobga olish muhimligini ta’kidladi.

Muhiddin Ibragimovning aytishicha, sun’iy yo‘ldoshlarni koinotga chiqarish muddatlari 2-3 yil oldin tasdiqlanadi, shuning uchun o‘z vaqtida shartnomalar tuzish va texnik shartlarni tayyorlash muhimdir. Ta’kidlash kerak, loyiha doirasida 2024-yilda o‘zbekistonlik etti nafar talaba sun’iy yo‘ldosh kontseptsiyasini ishlab chiqish, uni yig‘ish va uchirishga tayyorlash uchun Kyusyu texnologiya institutida magistratura bosqichida tahsil olishni boshlagandi.

Talabalar 2027-yilgacha o‘qishni tugatishlari rejalashtirilgan, bir yildan so‘ng esa qurilmani koinotga uchirish mumkin bo‘ladi.

Avvalroq O‘zbekiston koinotga astronavtlarni yubormasligi haqida xabar berilgandi. “O‘zbekkosmos” rahbari mamlakat haligacha sun’iy yo‘ldosh uchirmaganining uchta sababini aytib o‘tgan.