O‘zbekiston Respublikasi Vazirlar Mahkamasining 31.05.2018-yildagi 408-son qaroriga asosan, haydovchilik guvohnomasini yo‘qotgan taqdirda quyidagi harakatlarni amalga oshirish kerak:

— Ariza beruvchi DYHXX organi (Davlat yo‘l harakati xavfsizligi xizmati) yoki Davlat xizmatlari markaziga o‘zi kelib murojaat qilishi yoki Yagona interaktiv davlat xizmatlari portalida (YIDXP) ro‘yxatdan o‘tishi mumkin.

Avtomototransport vositalarini oxirgi o‘n ikki oy davomida boshqargan shaxslarning milliy haydovchilik guvohnomalari tegishli imtihonlarsiz almashtiriladi.

Quyidagilar avtomototransport vositalarini o‘n ikki oy mobaynida boshqarganligini tasdiqlovchi hujjatlar hisoblanadi:

a) ishlayotgan haydovchilar uchun mehnat daftarchasidan ko‘chirma yoki ishlayotgan joyida unga biriktirilgan avtomototransport turi ko‘rsatilgan ma’lumotnoma (buyruqdan ko‘chirma);

b) shaxsiy avtomototransport vositalari haydovchilari uchun ularga tegishli bo‘lgan avtomototransport vositasining ro‘yxatdan o‘tganligi haqidagi qayd etish guvohnomasi;

v) ishonchnoma yoki ijara shartnomasi bilan avtomototransport vositasini boshqargan shaxslar uchun avtomototransport vositasi ro‘yxatdan o‘tganligi to‘g‘risidagi guvohnoma va uni boshqarish uchun notarial idora tomonidan tasdiqlangan ishonchnoma yoki ijara shartnomasi;

g) transport vositasi egasining yaqin qarindoshlari uchun avtomototransport vositasi ro‘yxatdan o‘tganligi to‘g‘risidagi guvohnoma va transport vositasi egasining fuqarolik javobgarligini majburiy sug‘urta qilish bo‘yicha sug‘urta polisi.

Ariza beruvchi elektron shakldagi so‘rovnomani to‘ldiradi. So‘rovnomaga quyidagi hujjatlar ilova qilinadi:

 

- eski namunadagi haydovchilik guvohnomasi va/yoki talonining rasmi (orqa hamda old tomoni) (agar mavjud bo‘lsa).

Ariza beruvchi yo‘qotilgan haydovchilik guvohnomasi o‘rniga yangi guvohnoma olish uchun murojaat qilganda, uning avtomototransport vositasini boshqarishga bo‘lgan huquqi mavjudligi yoki bu huquqdan mahrum etilmaganligi Tizimda tasdiqlanadi.

Agar ariza beruvchining yo‘qotilgan haydovchilik guvohnomasi haqidagi ma’lumotlar Tizimda aniqlanmasa, ariza beruvchi haydovchilik guvohnomasini olish bo‘yicha Nizom asosida DYHXX organlariga umumiy tartibda murojaat qiladi.

Yo‘qotilgan haydovchilik guvohnomasi o‘rniga yangi namunadagi milliy haydovchilik guvohnomasini berish uchun bazaviy hisoblash miqdorining (BHM) 1 baravari miqdorida to‘lov undiriladi.

To‘lov amalga oshirilgandan so‘ng, DYHXX organi yoki Davlat xizmatlari markazi xodimi taqdim qilingan hujjatlarni ko‘rib chiqadi hamda milliy haydovchilik guvohnomasini rasmiylashtiradi.

Ariza beruvchi xohishiga ko‘ra, milliy haydovchilik guvohnomasini pochta aloqasi orqali olishi mumkin. Bunda pochta xarajatlari ariza beruvchi hisobidan qoplanadi.

Agar ariza beruvchi o‘zi kelib olishni xohlasa, shaxsini tasdiqlovchi hujjat bilan so‘rovnomada ko‘rsatilgan DYHXX organi yoki Davlat xizmatlari markaziga kelib milliy haydovchilik guvohnomasini olib ketishi mumkin.

Shuni ta’kidlash kerakki, agar ariza beruvchi berish rad etilgan kundan boshlab o‘ttiz ish kuni mobaynida davlat xizmatini ko‘rsatish uchun yig‘im to‘lamasdan ko‘rsatilgan kamchilikni bartaraf etgan holda takroran murojaat qilish huquqiga ega.