O‘zbekiston Respublikasi Prezidentining “Migratsiya jarayonlarini boshqarish tizimini isloh qilish bo‘yicha birinchi navbatdagi chora-tadbirlar to‘g‘risida”gi 2024-yil 17-oktabrdagi PF-162-son Farmoniga muvofiq O‘zbekiston Respublikasi Vazirlar Mahkamasi huzuridagi Migratsiya agentligi davlat muassasasi (keyingi o‘rinlarda – Agentlik) faoliyati tartibga solinadi.

Agentlik xorijiy mehnat sohasida davlat siyosatini amalga oshiruvchi, davlat organlarining ushbu yo‘nalishdagi faoliyatini muvofiqlashtiruvchi va mazkur sohada davlat xizmatlarini ko‘rsatuvchi vakolatli respublika ijro etuvchi hokimiyat organi hisoblanadi.

Agentlik respublika milliy manfaatlarini inobatga olgan holda, O‘zbekiston Respublikasi fuqarolarining mehnat migratsiyasi jarayonlarini tartibga solish va ularni xorijga tashkillashtirilgan holda yuborish tartibi to‘g‘risidagi xalqaro huquq normalari va qoidalariga asoslangan faoliyatni amalga oshiradi.

O‘zbekiston Respublikasi Vazirlar Mahkamasi Agentlikning muassisi hisoblanadi.

Agentlik xorijda vakolatxonalarini va respublikada alohida yuridik maqomga ega bo‘lmagan hududiy boshqarmalarini belgilangan tartibda tashkil etadi.

Agentlikning asosiy vazifalari hisoblanadi

• tashqi mehnat migratsiyasi jarayonlarini kompleks tartibga solish, fuqarolarni chet elga vaqtincha mehnat faoliyatini amalga oshirish uchun tashkillashtirilgan holda yuborish ishlarini nazorat qilish va chet elga vaqtincha mehnat faoliyatini amalga oshirish uchun chiqib ketgan fuqarolarning hisobini yuritish;
• xususiy bandlik agentliklarining O‘zbekiston Respublikasidan tashqarida ish qidirayotgan shaxslarni ishga joylashtirish bo‘yicha faoliyatini litsenziyalash, litsenziya talablari va shart-sharoitlariga rioya etilishini nazorat qilish;
• migratsiya sohasida xalqaro loyihalarini ishlab chiqish va amalga oshirish, fuqarolarni xorijda vaqtincha ishga joylashtirish va ularning mehnat huquqlarini ta’minlash masalalari bo‘yicha chet davlatlarining vakolatli organlari bilan hamkorlik qilish;
• xorijiy ish beruvchilarning talablaridan kelib chiqib kasbga tayyorlash va chet tilini o‘rgatish ishlarini tashkil qilish, rivojlangan davlatlarda tan olinadigan malakani baholash va sertifikatlash tizimlarini joriy qilish;
• chet elga vaqtincha mehnat faoliyatini amalga oshirish vaqtida huquqlari buzilgan, murakkab moliyaviy va boshqa qiyin ahvolda qolgan fuqarolarni qonunchilikda belgilangan tartibda huquqiy va ijtimoiy himoya qilish, ularni O‘zbekiston Respublikasiga qaytarishga ko‘maklashish;
• O‘zbekistonning xorijdagi va chet mamlakatlarining respublikamizdagi diplomatik muassasalar bilan doimiy hamkorlik qilish, xorijdagi diasporalar va vatandoshlar bilan aloqalarni kengaytirish.

Agentlik o‘z zimmasiga yuklatilgan vazifalarga muvofiq quyidagi funksiyalarni bajaradi

• O‘zbekiston Respublikasi fuqarolarini vaqtincha mehnat faoliyatini amalga oshirish uchun xorijga jo‘natish maqsadida xorijiy mamlakatlarning mehnat bozorini o‘rganadi, xorijiy ish beruvchilarni topadi, O‘zbekiston Respublikasi fuqarolarini tashkillashtirilgan holda tanlash to‘g‘risida xorijiy ish beruvchilar va xususiy agentliklar bilan shartnomalar tuzadi hamda ularning amalga oshishini ta’minlaydi;
• o‘z vakolati doirasida O‘zbekiston Respublikasi fuqarolarini xorijda tashkillashtirilgan holda ishga joylashtirish sohasida xalqaro va mintaqaviy tashkilotlar, xorijiy mamlakatlarning vakolatli organlari bilan muzokaralar olib boradi, xalqaro, davlatlararo va idoralararo shartnomalar, bitimlar va bayonnomalar loyihalarini tayyorlaydi;
• O‘zbekiston Respublikasi fuqarolarini xorijda ishga joylashtirish masalalari bo‘yicha O‘zbekiston Respublikasining xorijiy mamlakatlar bilan hamkorligi to‘g‘risidagi shartnomalar, bitimlar, bayonnomalar va boshqa hujjatlardan kelib chiqadigan tegishli qarorlar va majburiyatlarning xorijiy hamkorlar va ish beruvchilar tomonidan bajarilishini muvofiqlashtiradi;
• xorijga ishlash uchun ketayotgan fuqarolarni ishga joylashadigan davlatning qonun hujjatlari asoslari, an’analari va u erda o‘zini tutish normalaridan xabardor qiladi;
• xorijga ishga yuborish uchun O‘zbekiston Respublikasi fuqarolarini xorijiy ish beruvchilar va rekruting tashkilotlar bilan shartnomalar asosida tanlab oladi, ularni ketishdan oldin tayyorlaydi va jo‘natadi;
• xorijda mehnat faoliyatini amalga oshirayotgan O‘zbekiston Respublikasi fuqarolarining yagona ma’lumotlar bazasini shakllantirishda ishtirok etadi, shuningdek, xorijiy ish beruvchilar reestrini yuritadi;
• vaqtincha mehnat faoliyatini amalga oshirish uchun xorijga ketayotgan O‘zbekiston Respublikasi fuqarolarini kasbga tayyorlaydi, ketishdan oldin moslashtiradi, qayta tayyorlaydi va malakasini oshiradi, ularga chet tillarni, xavfsizlik texnikasi va ishlab chiqarishda mehnatni himoya qilish qoidalarini o‘rgatadi;
• xorijiy ish beruvchilar talablarini hisobga olgan holda, ishga joylashtirish uchun xorijga yuborilayotgan O‘zbekiston Respublikasi fuqarolarini vakolatli tibbiyot muassasalarini jalb qilgan holda kompleks tibbiy ko‘rikdan o‘tkazishni tashkillashtiradi;
• O‘zbekiston Respublikasi fuqarolari mehnat faoliyatini amalga oshirish uchun respublika hududidan transportda ketayotganda ularning xavfsizligini ta’minlash choralarini ko‘rishda ishtirok etadi;
• chet el fuqarolarining O‘zbekiston Respublikasi hududida vaqtincha mehnat faoliyatini amalga oshirish huquqini beruvchi tasdiqnomalarni beradi, ularning muddatini uzaytiradi va amal qilishini tugadi;
• vaqtincha mehnat faoliyatini amalga oshirish uchun xorijga ketayotgan fuqarolarni ketishdan oldin moslashtirish markazlari, o‘qitish, qayta o‘qitish va malaka oshirish markazlari, til o‘rgatish markazlari faoliyatini, jumladan, davlat- xususiy sheriklik shartlari asosida tashkil etadi va boshqaradi;
• xususiy bandlik agentliklariga O‘zbekiston Respublikasidan tashqarida ish qidirayotgan shaxslarni ishga joylashtirish bo‘yicha faoliyatni amalga oshirish uchun litsenziya berish;
• xususiy bandlik agentliklarining litsenziya talablari va shart-sharoitlariga rioya etilishini nazorat qilish;
• litsenziyaga ega bo‘lmagan yuridik shaxslar tomonidan shaxslarni O‘zbekiston Respublikasi hududidan tashqarida ish bilan ta’minlashni targ‘ib qilish yoki ish bilan ta’minlash holatlarini tekshirish;
• O‘zbekiston Respublikasi Tashqi ishlar vazirligi ko‘magida O‘zbekiston Respublikasining xorijdagi diplomatik vakolatxonalari va konsullik muassasalari, shuningdek, Agentlikning xorijdagi vakolatxonalari orqali xorijda ishlayotgan O‘zbekiston Respublikasi fuqarolarining mehnat faoliyati monitoringini olib boradi;
• xorijda mehnat faoliyatini amalga oshirayotgan fuqarolarni, shu jumladan Migratsiya jamg‘armasi, shuningdek, O‘zbekiston Respublikasining xorijiy
• davlatlardagi diplomatik muassasalari bilan hamkorlikda huquqiy va ijtimoiy himoya qilish, moddiy qo‘llab-quvvatlash choralarini ko‘radi;
• hududiy boshqarmalariga mehnat migratsiyasi masalalari bo‘yicha metodik yordam ko‘rsatadi, xorijiy mehnat bozori hamda salohiyatli ish beruvchilar to‘g‘risida ma’lumot beradi, xodimlarini rag‘batlantiradi va moddiy-texnika bazasini mustahkamlashga ko‘maklashadi;
• qonunchilikka muvofiq boshqa vakolatlarni ham amalga oshirishi mumkin.

Agar Siz migratsiya masalalari bo‘yicha muammoga duch kelgan bo‘lsangiz yoki migratsiyaga oid savollaringiz bo‘lsa, "1282" qisqa raqami orqali murojaat qilishingiz mumkin.