Ixtisoslashtirilgan ta’lim muassasalarida davolash-sog‘lomlashtirish ishlari

Amaldagi qonunchilikda sanatoriy turidagi maktab-internatlar alohida muassasa turi sifatida belgilanmagan.

Hozir alohida ta’lim ehtiyojlari bo‘lgan bolalar uchun davlat ixtisoslashtirilgan ta’lim muassasalari quyidagi turlarga bo‘linadi:

eshitishida nuqsoni bo‘lgan bolalar uchun maktab va maktab-internatlar;
ko‘rishida nuqsoni bo‘lgan bolalar uchun «Nurli maskan» maktab va maktab-internatlari;
ruhiy va aqliy rivojlanishida nuqsonlari bo‘lgan bolalar uchun maktab va maktab-internatlar;
tayanch-harakat apparatida nuqsoni bo‘lgan bolalar uchun maktab-internatlar;
ko‘p funktsional inklyuziv-resurs maktablar;
ko‘p tarmoqli ixtisoslashtirilgan maktablar.

Bolani qabul qilish tartibi

Bola ixtisoslashtirilgan ta’lim muassasasiga:

hududiy psixologik-tibbiy-pedagogik komissiya xulosasi;
ota-ona yoki ota-ona o‘rnini bosuvchi shaxsning roziligi;
bolaning ta’lim ehtiyoji va sog‘lig‘iga oid zarur hujjatlar asosida qabul qilinadi.

Muassasa turi bolaning sog‘lig‘i, rivojlanish xususiyatlari va ta’lim ehtiyojlariga qarab belgilanadi.

Tibbiy va sog‘lomlashtirish xizmatlari

Ixtisoslashtirilgan ta’lim muassasalarida bolalarni:

sog‘lomlashtirish va reabilitatsiya qilish;
kasalliklar xurujining oldini olish;
sanitariya-gigiena va profilaktika tadbirlari bilan qamrab olish;
psixologik va korrektsion-pedagogik qo‘llab-quvvatlash ishlari tashkil etiladi.

Mazkur tadbirlar muassasaning tibbiyot xodimlari tomonidan amalga oshiriladi. Tibbiyot xodimlari pedagoglarga bolaning sog‘lig‘i va rivojlanish xususiyatlarini hisobga olgan holda individual yondashish bo‘yicha tavsiyalar beradi.

O‘quvchilarga yaratiladigan sharoitlar

Ixtisoslashtirilgan ta’lim muassasalari o‘quvchilari:

bepul umumiy o‘rta ta’lim olish;
bepul tibbiy xizmatdan foydalanish;
belgilangan me’yorlar asosida bepul oziq-ovqat bilan ta’minlanish;
to‘garaklar, tanlovlar, olimpiadalar va boshqa tadbirlarda ishtirok etish huquqiga ega.

Bolaning davolanishi yoki sog‘lomlashtirilishi maxsus tibbiy nazoratni talab qilsa, unga sog‘liqni saqlash va ijtimoiy himoya tizimidagi tegishli muassasalarda xizmat ko‘rsatilishi mumkin.

Normativ hujjatlar

O‘zbekiston Respublikasi Vazirlar Mahkamasining 2021-yil 12 oktyabrdagi 638-son qarori

Maqola foydali bo‘ldimi?

Bo‘limlar