Nogironligi bo‘lgan shaxslarning ta’lim olish huquqi

Nogironligi bo‘lgan shaxslar barcha darajalarda ta’lim olish va kasb-hunar egallash huquqiga ega.

Ta’lim ularning individual imkoniyatlari va ehtiyojlarini hisobga olgan holda:

umumiy ta’lim tashkilotlarida inklyuziv shaklda;
ixtisoslashtirilgan ta’lim tashkilotlarida;
uyda yakka tartibda;
masofaviy yoki boshqa moslashtirilgan shakllarda tashkil etilishi mumkin.

Maktabgacha va umumiy o‘rta ta’lim

Alohida ta’lim ehtiyojlari bo‘lgan bolalar uchun maktabgacha ta’lim tashkilotlari va maktablarda inklyuziv ta’lim tashkil etiladi.

Inklyuziv yoki boshlang‘ich tayanch korrektsion sinfga qabul qilish psixologik-tibbiy-pedagogik komissiya xulosasi hamda ota-ona yoki uning o‘rnini bosuvchi shaxsning roziligi asosida amalga oshiriladi.

Ta’lim tashkilotida bolaning harakatlanishi, o‘qishi va zarur maxsus vositalardan foydalanishi uchun sharoit yaratilishi kerak.

Professional va oliy ta’lim

Maxsus shart-sharoitlarga muhtoj shaxslar uchun professional ta’lim maxsus dasturlar va moslashtirilgan o‘quv sharoitlari asosida tashkil etiladi.

Oliy ta’lim tashkilotlarida nogironligi bo‘lgan shaxslar uchun abiturientlarni qabul qilish umumiy soniga nisbatan 2 foiz miqdorida qo‘shimcha davlat granti kvotasi ajratiladi.

Qo‘shimcha kvotada quyidagilar ishtirok etadi:

I va II guruh nogironligi bo‘lgan shaxslar;
nogironligi bo‘lgan bolalar.

Ular belgilangan hujjatlarni taqdim etadi va kirish imtihonlarida ishtirok etadi.

Qo‘shimcha kvota bo‘yicha qabul

Abiturient qo‘shimcha kvota bo‘yicha o‘qishga qabul qilinmasa, to‘plagan bali bilan tegishli ta’lim yo‘nalishi bo‘yicha umumiy tanlovda ham ishtirok etadi.

Ko‘zi ojizlar toifasi va nogironligi bo‘lgan shaxslar uchun ajratilgan kvota doirasida davlat granti asosida o‘qiyotgan talabalarning o‘qishini mos yoki turdosh ta’lim yo‘nalishiga davlat granti asosida ko‘chirishga ruxsat etiladi.

Davolanayotgan bolalarning ta’limi

Statsionar davolash, profilaktika yoki reabilitatsiya muassasalarida uzoq muddat davolanayotgan nogironligi bo‘lgan bolalar uchun o‘quv mashg‘ulotlari mazkur muassasalarda tashkil etiladi.

Normativ hujjatlar

O‘zbekiston Respublikasining «Nogironligi bo‘lgan shaxslarning huquqlari to‘g‘risida»gi Qonuni

O‘zbekiston Respublikasi Vazirlar Mahkamasining 2018-yil 2 iyundagi 417-son qarori

O‘zbekiston Respublikasi Vazirlar Mahkamasining 2021-yil 12 oktyabrdagi 638-son qarori

Maqola foydali bo‘ldimi?

Bo‘limlar